ആത്മോപദേശ ശതകം ഖണ്ഡം 3

കരുവായത് എന്തെന്ന് വിവരിക്കാൻ സാധിക്കില്ല. ഉള്ളിലും പുറത്തും നിറയുന്ന വൈഭവം, ആത്മസത്ത എന്നൊക്കെ ഉപരിപ്ലവമായ ചില പരിപ്രേക്ഷ്യങ്ങൾ ആവാം എന്ന് മാത്രം. എന്തായാലും ഗുരുവിന്റെ അഥവാ യോഗിയുടെ ഉള്ളിലും പുറമെയും സമമായി വിളങ്ങുന്ന ആത്മസത്തയെ കണ്ണുകൾ അഞ്ചും ഉള്ളിലടക്കി വീണു വണങ്ങണം എന്ന് ശ്രീനാരായണ ഗുരു.

കണ്ണുകളഞ്ചും- മനുഷ്യന് എവിടെയാണ് 5 കണ്ണുകൾ. അഞ്ച് ഇന്ദ്രിയങ്ങളുണ്ട്. കർമ്മേന്ദ്രിയങ്ങളും ജ്ഞാനേന്ദ്രിയങ്ങളും അഞ്ചാണെന്ന് തന്ത്രം പറയുന്നു. കണ്ണ്,മൂക്ക്, നാക്ക്, ത്വക്ക്, ചെവി എന്നിങ്ങനെയുള്ള ജ്ഞാനേന്ദ്രിയങ്ങൾ എങ്ങനെ അടക്കും. വാക്, പായു, പാണി, പാദ, ഉപസ്ഥാദിയായ പഞ്ച കർമ്മേന്ദ്രിയങ്ങളെ അടക്കാൻ എളുപ്പമാണ് എന്ന് തോന്നുന്നു. വാക്കുകൾ അടക്കാൻ സംയമം പാലിക്കാൻ മനുഷ്യന് സാധിക്കും. പാണി (കൈ) കൊണ്ടുള്ള ചലനങ്ങൾ, അവയുടെ നിയന്ത്രണവും മനുഷ്യന് അടക്കാനാവും. ആഹാരനിയന്ത്രണം വഴി പായു മുഖേനയായ വിസർജ്ജനം നിയന്ത്രിക്കാം. വൈകാരിക സംയമനം മുഖേന പ്രത്യുൽപാദനവും. ആദ്യം വിവരിച്ച കണ്ണ്, മൂക്ക്, നാക്ക്, ത്വക്കാദികളെ എങ്ങനെ അടക്കാനാവും എന്ന് നിശ്ചയമില്ല.